बदनाम गराउन प्रयास गर्ने मिडिया विरुद्ध अदालत जाने नगर प्रमुख कार्कीको भनाई

4k Shares

होतरीको बर्दिबास नगरपालिकाकाका नगर प्रमुख विदुर कार्कीले केही मिडियाहरुमा आएका भ्रामक समाचार प्रति आफ्नो गम्भीर ध्यानाकर्षण भएको बताउनुभयो । महालेखापरीक्षकले हालै सार्वजनिक गरेको ५८ औं प्रतिवेदनको आधारमा सोमबार केही मिडियाहरुले ‘कृषि पोखरी खन्ने नाममा बर्दिबासका मेयर कार्कीले कानुन विपरीत करोडौंको ग्राइभेल बेचेको खुलासा’ शीर्षको समाचार प्रकाशन गरेका थिए । जस समाचारमा कुनै सत्यता नभएको भन्दै आफ्नो बद्नाम गराउने काम भएकोले आफ्नो गंभिर ध्यानाकर्षण भएको नगर प्रमुख कार्कीले कमलामाई मिडिया प्रालिलाई बताउनु भयो ।
नगर प्रमुख कार्कीले आफ्नो कार्यकक्षमा वास्ताविकता बुझ्न पुगेको कमलामाई मिडिया प्रालिको टोलीलाई उक्त समाचारमा कुनै सत्यता नरहेको र आफ्नो बद्नाम गराउने गरी कोही कसैले प्रयोग गरेको भरमा उचालिएर वास्तविकता नबुझि समाचार सम्प्रेषण गर्ने पत्रकार र मिडिया हाउस प्रति आफु अदालत जाने बताउनु भयो ।
उहाँले नेपाल सरकारकै निर्णय बमोजिम प्राथमिकता प्राप्त योजनाहरुलाई पोखरी निर्माण गर्दा निस्केको ढुंगा, रोडा तथा ग्राइभेल राजश्व लिई विक्री गरेको समेत स्पष्ट पार्नु भयो । उहाँले वास्तविक कुरा नबुझी तथ्य भन्दा बाहिर गएर भ्रम सृजना गरी बदनाम गराउने गलत मनसायले समाचार सम्प्रेषण गरेको भन्दै त्यसको खण्डन गर्नु भएको छ ।
‘म नगरप्रमुखको हैसियतले नगरपालिकाका विकास तथा राजश्व संकलन कार्यमा संविधान तथा कानुनले दिएको अधिकार उपयोग गरी नगरको विकासको अभियानमा सरिक भएको ठानेको छु’ नगर प्रमुख कार्कीले बताउनु भयो । ‘ठेकेदारसंग मिलेमतो गरी कानुन विपरीत गइ भ्रष्टाचार गरेको कपोकल्पित र सरासर झुठो हो भनि खण्डन गर्दछु ।’ उहाँले बताउनु भयो ।
महालेखा परीक्षाको प्रारम्भिक प्रतिवेदन नगरपालिकामा आए पश्चात भएका त्रुटिहरु सच्याइ सकिएको र बाँकी राजश्वय समेत नियमानुसार असुल उपर गरेको र केहि गर्ने क्रममा रहेको उहाँको भनाई छ । नगर प्रमुख कार्कीले माछा पोखरी निर्माण गर्दा निस्किने ढूंगा, रोडा तथा ग्राभेल खानी विक्री वितरण र राजश्व संकलनको विषयमा समेत स्पष्ट पार्नु भएको छ ।
नगर कार्यपालिकाको निर्णयका आधारमा ५० हजार घनमिटर ग्राइभेल रोडाको लागि शिवालय दिवा जेभीसँग रु. ९० लाख ७३ हजार २ सय ८० मा नगरपालिकासँग भएको सम्झौता बताउँदै सो परिमाण बराबरको रकम नगरपालिकालाइ प्राप्त भइसकेको नगर प्रमुख कार्कीले जानकारी दिनुभयो ।
प्राविधीक प्रतिवेदन अनुसार तोकिएको परिणाम भन्दा बढी उत्खन्न गरि लगेको ६ हजार २ सय ५४ दशमलव ५ घन मिटरको मूल्य अभिवृद्धि कर सहितको रोयल्टी रु ९ लाख ९७ हजार ६ सय ६० रकम दाखिला गर्न मिति २०७७ चैत ५ गते पत्राचार गरिएको पनि उहाँले बताउनु भयो ।
त्यसैगरि १ लाख ५० हजार घनमिटर साधारण निर्माणमुखी रोडा, मिसकट ग्राभेल पोखरीबाट खनी लैजानका लागि रोशन कन्सटक्सन प्रालिसँग रु २ करोड ३९ लाख १९ हजार ८ सय ४० मा सम्झौता भएकोमा सम्झौता गर्दा बखत नै रु ६० लाख नगरपालिकामा दाखिला गरेको र रु १ करोड ८० लाख नेपाल बंगलादेश बैँक कुमारी पार्टी ललितपुरको बैंक ग्यारेन्टीमा जम्मा गरि नगरपालिकासँग सम्झौता भएको नगर प्रमुख कार्कीको भनाइ छ ।
प्राविधीक प्रतिवदेन अनुसार १ लाख ४ हजार ३ सय १४ घनमिटर मात्र रोशन कन्ट्रक्सनले खनि लगेकोमा तोकिएको म्यादभित्र उक्त परिणामको मूल्य अभिवृद्धि कर सहित रोयल्टी रु १ करोड ६६ लाख ३९ हजार २ सय २३ मध्ये हालसम्म रु १ करोड १२ लाख ६० हजार ४ सय नगरपालिकालाई प्राप्त भएको नगर प्रमुख कार्कीले बताउनु भयो । उहाँले कन्ट्रक्सनमाथि बाँकी रकम रु ५३ लाख ७८ हजार ८ सय २३ रुपैँया असुल उपर गर्न बैँक ग्यारेन्टी दिने बैँकलाई २०७८ वैशाख ३० गते पत्राचार गरिएको जानकारी दिनु भयो ।
नगरस्तरका ५ योजनाहरुमा उक्त पोखरीबाट १६ हजार ४८ घनमिटर ग्राभेल खनि लगेको बापत मूल्य अभिवृद्धि कर सहित रोयल्टी रकम रु २६ लाख २२ हजार ९ सय ४७ उपभोक्ता समितीबाट नगरपालिकालाई प्राप्त भएको समेत उहाँले बताउनु भयो ।
माछा पोखरी खन्दा निस्केको साधारण निर्माणमुखी रोडा विक्रीबाट हालसम्म रु २ करोड १८ लाख ५६ हजार ६ सय २७ रुपैँया नगरपालिकालाई प्राप्त भएको बताउँदै नगर प्रमुख कार्कीले रु ६३ लाख ७६ हजार ४ सय ८४ असुल उपर गर्ने क्रममा रहेको समेत प्रष्ट पार्नु भयो । हालसम्म सो माछा पोखरीबाट रु २ करोड ८२ लाख ३३ हजार १ सय ११ रुपैँया राजश्व संकलन भएको नगरपालिकाको भनाई छ ।

सम्बन्धित समाचार