दानबहादुर कार्कीले अदालतबाट न्याय पाउने प्रचण्डको विश्वास

1k Shares

काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले प्रहरी महानिरीक्षक पदबाट हटाइएका दानबहादुर कार्कीले सर्वोच्च अदालतबाट न्याय पाउने विश्वास व्यक्त गरेका छन् ।

शनिबार काठमाडौँमा सञ्चारकर्मीसँग कुरा गर्दै प्रचण्डले सरकारले कार्कीलाई प्रहरी महानिरीक्षक पदबाट हटाएर अन्याय गरेको टिप्पणी गरेका हुन् ।

उनले कार्कीको विषयमा न्यायालयले उचित निर्णय गर्ने विश्वास व्यक्त गर्दै अदालतबाट न्याय निरूपण हुने अपेक्षा राखेको बताए ।

यसैगरी, उनले आफ्नो पार्टीले सञ्चालन गरिरहेको राष्ट्रिय जागरण अभियानपछि त्यसको समीक्षा गरी आगामी राजनीतिक तथा आन्दोलनका कार्यक्रम तय गरिने जानकारी दिए ।

प्रचण्डले नेकपा एमालेसँग मात्रै नभई नेपाली कांग्रेसलगायत संविधान र शान्तिको पक्षमा रहेका सबै राजनीतिक शक्तिलाई एक ठाउँमा ल्याएर अघि बढ्नुपर्ने धारणा राखे ।

वर्तमान सरकारको कार्यशैलीप्रति टिप्पणी गर्दै उनले सरकार जनताका वास्तविक समस्याभन्दा पनि बाहिरी तडकभडकमा रमाइरहेको आरोप लगाए । उनले प्रेस काउन्सिलसम्बन्धी अध्यादेश आवश्यक सुधार गरेर मात्रै अघि बढाउनुपर्नेमा समेत जोड दिए ।

प्रहरी महानिरीक्षक पदबाट हटाइएपछि दानबहादुर कार्कीले आफ्नो पदमुक्तिको निर्णयविरुद्ध सर्वोच्च अदालतमा कानुनी चुनौती दिएका छन् । उक्त विवादमा अदालतबाट हुने निर्णयलाई चासोका साथ हेरिएको छ ।

सम्बन्धित समाचार