हिमाल पग्लिनु वातावरणीय मात्रै होइन, मानव अस्तित्वकै चुनौती हो : प्रचण्ड

1.5k Shares

जनकपुरधाम । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले जलवायु परिवर्तनको विषयलाई नेपालले अन्तर्राष्ट्रिय मञ्चमा अझ प्रभावकारी ढंगले उठाउनुपर्ने बताएका छन् ।

पार्टीको कार्यक्रममा सहभागी हुन जनकपुरधाम पुगेका प्रचण्डले जलवायु परिवर्तनका कारण हिमाल तीव्र गतिमा पग्लिँदै जानु वातावरणीय समस्या मात्र नभई मानव सभ्यता र अस्तित्वसँग प्रत्यक्ष जोडिएको विषय भएको बताए ।

उनले जलवायु परिवर्तनबाट हिमाली क्षेत्र प्रभावित भइरहेकाले यसको असर विश्व समुदायको ध्यानाकर्षण हुने गरी अन्तर्राष्ट्रिय तहमा उठाउनुपर्नेमा जोड दिए ।

‘यो विषयमा म दोस्रो र तेस्रो पटक प्रधानमन्त्री भएका बेला थुप्रै अन्तर्राष्ट्रिय मञ्चमा प्रभावकारी ढंगले उठाएँ,’ प्रचण्डले भने, ‘यतिबेला यस विषयमा अन्तर्राष्ट्रिय समुदायको गम्भीर ध्यानाकर्षण गराउनुपर्छ ।’

प्रचण्डका अनुसार जलवायु परिवर्तनका कारण हिमाल पग्लिने क्रम तीव्र बन्दै जाँदा यसको असर हिमाली भूभागमा मात्रै सीमित छैन । जलवायु परिवर्तनले मानव जीवन, कृषि, पानीका स्रोत, जैविक विविधता तथा समग्र अर्थतन्त्रमा समेत गम्भीर प्रभाव पारिरहेको उनले बताए ।

हिमाल पग्लिनु मानव अस्तित्वकै चुनौती

नेपालजस्तो हिमाली मुलुकका लागि जलवायु परिवर्तनको प्रभाव अझ गम्भीर रहेको प्रचण्डको भनाइ छ । हिमाली क्षेत्रमा तापक्रम बढ्दै जाँदा हिमनदी पग्लिने, हिमतालको जोखिम बढ्ने तथा बाढीपहिरोजस्ता प्राकृतिक विपत्तिको जोखिमसमेत बढ्न सक्ने भएकाले नेपालले अन्तर्राष्ट्रिय समुदायसँग जलवायु न्याय र सहयोगका विषयमा निरन्तर पहल गर्नुपर्ने उनको धारणा छ ।

उनले जलवायु परिवर्तनबाट नेपालले भोगिरहेका असरलाई अन्तर्राष्ट्रिय समुदायसमक्ष तथ्य र प्रमाणसहित प्रस्तुत गर्नुपर्ने आवश्यकता औँल्याए ।

भोटेकोसी बाढीको उद्धारमा सरकार चुकेको आरोप

प्रचण्डले भोटेकोसी नदीमा आएको बाढीका क्रममा सुरुङभित्र फसेका व्यक्तिको खोज तथा उद्धारका लागि तत्काल अन्तर्राष्ट्रिय समुदाय, सम्बन्धित क्षेत्रका विज्ञ तथा उद्धार टोलीको सहयोग लिन नसक्नु सरकारको कमजोरी भएको आरोप पनि लगाए ।

उनले बाढी आएको तत्कालीन समयमा उपलब्ध अन्तर्राष्ट्रिय सहयोग र प्राविधिक विशेषज्ञताको उपयोग गरेर सुरुङभित्र फसेकाको खोज तथा उद्धारलाई तीव्रता दिन सकिने अवस्था रहेको दाबी गरे ।

‘भोटेकोसी नदीमा बाढी आएको तत्कालीन समयमा सरकारले अन्तर्राष्ट्रिय समुदाय तथा सम्बन्धित क्षेत्रका विज्ञ र उद्धार टोलीको सहयोग लिएर सुरुङभित्र फसेकाको खोज तथा उद्धारलाई तीव्रता दिन नसक्नु सरकारको कमजोरी हो,’ उनले भने ।

भोटेकोसी बाढीपछि नेपालमा ठूलो मानवीय तथा भौतिक क्षति भएको छ । विशेषगरी रसुवा, नुवाकोट, धादिङलगायतका क्षेत्रमा बाढीपहिरोले सडक, पुल, जलविद्युत् आयोजना तथा बस्तीमा ठूलो क्षति पुर्‍याएको छ । जलविद्युत् आयोजनाका सुरुङ तथा अन्य संरचनामा समेत मानिस फसेको विवरण सार्वजनिक भएपछि उद्धार कार्य थप चुनौतीपूर्ण बनेको थियो ।

यस घटनाले प्राकृतिक विपत्तिको सामना गर्न नेपालमा पूर्वतयारी, तत्काल उद्धार संयन्त्र, अन्तर्राष्ट्रिय समन्वय र अत्याधुनिक प्राविधिक क्षमताको आवश्यकता थप स्पष्ट पारेको छ ।

प्रचण्डले जलवायु परिवर्तनबाट सिर्जित जोखिम न्यूनीकरणका लागि नेपालले अन्तर्राष्ट्रिय सहयोग र जलवायु वित्तमा पहुँच बढाउनुपर्ने तथा नेपालले भोगिरहेको क्षतिको विषयलाई विश्व समुदायसमक्ष प्रभावकारी रूपमा प्रस्तुत गर्नुपर्नेमा जोड दिएका छन् ।

सम्बन्धित समाचार