काठमाडौँ । चिया निर्यातमा पछिल्लो समय देखिएको अवरोध हटाउन कूटनीतिक पहल गर्न व्यवसायीहरूले सरकारसँग आग्रह गरेका छन्। चिया व्यवसायसँग आबद्ध उद्यमीहरूको छाता संगठन नेपाल उद्योग वाणिज्य महासंघले निर्यात प्रक्रिया सहज बनाउन छिमेकी तथा गन्तव्य मुलुकसँग उच्चस्तरीय संवाद आवश्यक भएको बताएको हो।
महासंघका अनुसार सीमामा हुने ढिलाइ, प्राविधिक मापदण्ड (स्ट्यान्डर्ड) सम्बन्धी जटिलता, परीक्षण तथा प्रमाणीकरण प्रक्रियामा एकरूपताको अभावले चिया निर्यात प्रभावित भएको छ। यसले किसानदेखि उद्योगी र निर्यातकसम्मलाई आर्थिक दबाब सिर्जना गरेको महासंघको भनाइ छ।
महासंघले परराष्ट्र मन्त्रालय, उद्योग मन्त्रालय र सम्बन्धित निकायबीच समन्वय बढाई द्विपक्षीय वार्ता, प्राविधिक सहकार्य तथा निर्यात–आयात प्रोटोकलको पुनरावलोकन गर्न सरकारसँग आग्रह गरेको छ। साथै, गुणस्तर प्रमाणीकरण, भन्सार प्रक्रिया सरलिकरण र सीमा व्यवस्थापन सुधारमा तत्काल कदम चाल्नुपर्ने माग पनि अघि सारिएको छ।
नेपालको उच्च पहाडी र मध्यपहाडी क्षेत्रमा उत्पादन हुने अर्गानिक चियाको अन्तर्राष्ट्रिय बजारमा राम्रो माग रहेकाले अवरोध हटेमा निर्यात वृद्धि र किसानको आयमा उल्लेख्य सुधार आउने महासंघले विश्वास व्यक्त गरेको छ।