अन्तर्राष्ट्रिय बजार महँगिँदा आयल निगम फेरि घाटामा

2.9k Shares

काठमाडौं । नाफामा चलिरहेको अवस्थामा देखिएको नेपाल आयल निगम अहिले फेरि ठूलो घाटामा पुगेको छ । अन्तर्राष्ट्रिय बजारमा पेट्रोलियम पदार्थको मूल्यवृद्धि भएपछि निगमले १५ दिनमै करिब एक अर्ब २५ करोड रुपैयाँ घाटा व्यहोर्नुपरेको जनाएको छ ।

भारतीय आयल कर्पोरेशन (आईओसी) बाट प्राप्त नयाँ मूल्यसूचीअनुसार खरिद मूल्य उल्लेख्य बढे पनि नेपालमा खुद्रा बिक्री मूल्य सोही अनुपातमा समायोजन नगरिएकाले घाटा बढेको निगमको भनाइ छ । डिजेल र खाना पकाउने ग्यासमा सबैभन्दा बढी नोक्सानी भइरहेको निगमले जनाएको छ ।

निगमका अनुसार डिजेलमा प्रतिलिटर ठूलो घाटा भइरहेको छ भने एलपी ग्यासमा पनि प्रति सिलिन्डर उच्च नोक्सानी व्यहोर्नुपरेको छ । पेट्रोल, मट्टितेल र आन्तरिक हवाई इन्धनमा समेत घाटा देखिएको निगमले जनाएको छ ।

यसअघि अन्तर्राष्ट्रिय बजारमा मूल्य घटेका बेला निगमले नाफा कमाएको थियो । तर पुरानो सञ्चित घाटा र ऋण देखाउँदै उपभोक्तामाथि मूल्य घटाउन नसकिएको तर्क गर्दै आएको थियो ।

निगमले अहिलेको जटिल अवस्थाबीच पनि पेट्रोलियम पदार्थको आपूर्ति सहज बनाइएको दाबी गरेको छ । अन्तर्राष्ट्रिय बजारमा मूल्य घटेपछि नेपालमा पनि मूल्य समायोजन गरिने निगमको भनाइ छ ।

सम्बन्धित समाचार