काठमाडौं । विपद् प्रभावित क्षेत्रमा दीर्घरोगीका लागि आवश्यक पौष्टिक खाना तथा औषधि प्राथमिकताका साथ उपलब्ध गराउनुपर्नेमा जोड दिइएको छ।
बाढी, पहिरो तथा अन्य प्राकृतिक विपद्का कारण स्वास्थ्य सेवा र नियमित औषधि सेवनमा समस्या भइरहेका दीर्घरोगी थप जोखिममा पर्न सक्ने भएकाले उनीहरूको स्वास्थ्य अवस्थालाई विशेष प्राथमिकतामा राख्नुपर्ने बताइएको हो।
विपद्का बेला खानेपानी, खाद्यान्न र स्वास्थ्य सामग्रीको अभाव हुने भएकाले मधुमेह, उच्च रक्तचाप, मुटु, मिर्गौला लगायतका दीर्घरोग भएका व्यक्तिले नियमित औषधि सेवन गर्न नपाउने अवस्था आउन सक्छ। यस्तो अवस्थामा सम्बन्धित निकायले आवश्यक औषधि र पोषणयुक्त खाना सहज रूपमा उपलब्ध गराउनुपर्नेमा जोड दिइएको छ।
विशेषगरी विपद् प्रभावित तथा दुर्गम क्षेत्रमा राहत सामग्री वितरण गर्दा दीर्घरोगी, ज्येष्ठ नागरिक, गर्भवती तथा अन्य जोखिममा रहेका नागरिकको स्वास्थ्य आवश्यकतालाई प्राथमिकतामा राख्नुपर्ने सुझाव दिइएको छ।
विपद्पछिको उद्धार र राहतसँगै स्वास्थ्य जोखिम न्यूनीकरणका लागि नियमित उपचार तथा औषधिको निरन्तरता सुनिश्चित गर्नुपर्नेमा सम्बन्धित सरोकारवालाले जोड दिएका छन्।