बेपत्ताको पहिचान गर्न बाँकेमा १६ जनाको डीएनए परीक्षण

785 Shares

बाँके, २१ भदौ । रसुवाको भोटेकोशी बाढीपछि हराइरहेका वा ज्यान गुमाएका व्यक्तिको शव पहिचानका लागि बाँके जिल्लाबाट १६ जना आफन्तको डीएनए नमूना सङ्कलन गरिएको छ। जिल्ला प्रहरी कार्यालय बाँकेका अनुसार बाढीमा बेपत्ता भएका व्यक्तिका नजिकका आफन्तबाट नमूना सङ्कलन गरी परीक्षणका लागि पठाइएको हो।

बाढीपछि विभिन्न स्थानमा फेला परेका तर पहिचान खुल्न नसकेका शवको वैज्ञानिक रूपमा सनाखत गर्न डीएनए परीक्षणलाई तीव्रता दिइएको छ। यसका लागि देशभरबाट बेपत्ता व्यक्तिका परिवारजनको नमूना सङ्कलन भइरहेको प्रहरीले जनाएको छ।

नेपाल प्रहरी अस्पताल तथा सम्बन्धित निकायले सङ्कलित नमूनालाई फेला परेका शव वा शरीरका अङ्गबाट लिइएका नमूनासँग तुलना गरी पहिचान गर्ने प्रक्रिया अघि बढाइरहेका छन्। अधिकारीहरूका अनुसार सही पहिचान सुनिश्चित गर्न बाबु, आमा, छोरा, छोरी वा अन्य नजिकका रगतसम्बन्धी आफन्तको नमूना उपयोगी हुने गर्दछ।

भोटेकोशी, त्रिशूली र आसपासका नदी तटीय क्षेत्रमा बाढीपछि ठूलो सङ्ख्यामा शव फेला परेकाले पहिचान प्रक्रिया चुनौतीपूर्ण बनेको छ। यसै कारण डीएनए परीक्षणमार्फत बेपत्ता व्यक्तिको पहिचान गर्ने कार्यलाई प्राथमिकताका साथ अघि बढाइएको प्रहरीले जनाएको छ।

सम्बन्धित समाचार