काठमाडौं/पश्चिम नवलपरासी । पश्चिम नवलपरासीका उखु किसानले आर्थिक वर्ष २०८२/८३ को अनुदान रकम समयमै प्राप्त गरेका छन्। सरकारले असार मसान्तमै उखु अनुदानबापतको रकम निकासा गरेपछि किसानहरूको बैंक खातामा १२ करोड ५० लाख रुपैयाँभन्दा बढी रकम जम्मा गरिएको हो।
समयमै अनुदान प्राप्त भएपछि किसानहरू उत्साहित भएका छन्। विगतका वर्षमा अनुदान भुक्तानीमा ढिलाइ हुने गरेको भए पनि यसपटक सरकारले समयमै रकम उपलब्ध गराएकाले किसानलाई खेती व्यवस्थापन र आगामी उखु उत्पादनको तयारीमा सहज भएको छ।
उखु खेतीलाई प्रोत्साहन गर्ने उद्देश्यले सरकारले उपलब्ध गराउने अनुदान प्रत्यक्ष रूपमा किसानको बैंक खातामा पठाइएको हो। सम्बन्धित निकायका अनुसार आवश्यक प्रक्रिया पूरा गरेका सबै किसानले अनुदान रकम प्राप्त गरेका छन्।
किसानहरूले समयमै अनुदान उपलब्ध गराएकोमा सरकारप्रति धन्यवाद दिँदै आगामी वर्षहरूमा पनि यही प्रणालीलाई निरन्तरता दिनुपर्ने बताएका छन्। उनीहरूले उखुको उत्पादन लागत बढ्दै गएकाले अनुदानसँगै उचित मूल्य र समयमै भुक्तानीको व्यवस्था पनि आवश्यक रहेको बताएका छन्।