काठमाडौं ।उद्योगी तथा व्यवसायी चन्द्र ढकालको नाम जोडेर सामाजिक सञ्जालमा ‘फेक भिडियो’ तयार गरी भ्रम फैलाइएको भन्दै त्यसप्रति सचेत रहन आग्रह गरिएको छ।
ढकालसँग सम्बन्धित भन्दै सामाजिक सञ्जालका विभिन्न प्लेटफर्ममा प्रसारित भिडियो वास्तविक नभएको र कृत्रिम रूपमा सम्पादन तथा प्रविधिको प्रयोग गरेर तयार पारिएको दाबी गरिएको छ। उक्त भिडियोमार्फत गलत सूचना फैलाउने प्रयास भएको भन्दै सम्बन्धित पक्षले त्यसमा विश्वास नगर्न सर्वसाधारणलाई आग्रह गरेको छ।
हाल कृत्रिम बुद्धिमत्ता (एआई) र डिजिटल सम्पादन प्रविधिको दुरुपयोग गरेर सार्वजनिक व्यक्तित्वको नाम र छवि जोडेर भ्रामक सामग्री बनाउने घटना बढ्दै गएको भन्दै यसप्रति सबै सचेत हुनुपर्ने बताइएको छ।
सम्बन्धित पक्षले यस्ता भ्रामक सामग्री सिर्जना र प्रसारणमा संलग्न व्यक्तिमाथि आवश्यक कानुनी कारबाहीको माग गर्दै साइबर अपराधसम्बन्धी निकायसँग समन्वय भइरहेको जनाएको छ।
सूचना प्रविधि विज्ञहरूले पनि सामाजिक सञ्जालमा देखिने भिडियो वा सामग्रीको सत्यता पुष्टि नगरी शेयर वा विश्वास नगर्न आग्रह गरेका छन्। उनीहरूका अनुसार एआई प्रविधिबाट तयार गरिएका ‘डीपफेक’ भिडियोले गलत सूचना फैलाउने र व्यक्तिको प्रतिष्ठामा क्षति पुर्याउने जोखिम बढाएको छ।
यस घटनापछि डिजिटल माध्यममा सूचना उपभोग गर्दा आधिकारिक स्रोतबाट पुष्टि गर्ने बानी बसाल्न तथा भ्रामक सामग्रीको प्रसार रोक्न सबैको जिम्मेवारी रहेको सरोकारवालाहरूले बताएका छन्।