काठमाडौं । अब बैंक तथा वित्तीय संस्थाका ग्राहकले शाखामा पुग्नै नपरी मोबाइल बैंकिङ वा बैंकको आधिकारिक एपमार्फत आफ्नै बैंक खाता बन्द गर्न सक्ने भएका छन्। नेपाल राष्ट्र बैंकले निष्क्रिय खाताको संख्या घटाउने र डिजिटल बैंकिङ सेवालाई थप सहज बनाउने उद्देश्यले यस्तो व्यवस्था गर्न बैंक तथा वित्तीय संस्थालाई निर्देशन दिएको हो।
नेपाल राष्ट्र बैंकले एकीकृत निर्देशन संशोधन गर्दै ग्राहकको अनुरोधका आधारमा डिजिटल माध्यमबाटै खाता बन्द गर्ने व्यवस्था मिलाउन निर्देशन दिएको छ। यसका लागि बैंकहरूले आवश्यक प्रणाली विकास गरी सुरक्षित र भरपर्दो प्रक्रिया सुनिश्चित गर्नुपर्नेछ।
यस व्यवस्थापछि ग्राहकले सामान्य बचत वा अन्य योग्य खाताहरू बन्द गर्न शाखामा अनिवार्य रूपमा उपस्थित हुनुपर्ने बाध्यता हट्ने अपेक्षा गरिएको छ। यसले विशेषगरी विदेशमा रहेका नेपाली, टाढाका ग्राहक तथा डिजिटल माध्यम प्रयोग गर्ने सेवाग्राहीलाई सहज हुने राष्ट्र बैंकको विश्वास छ।
यद्यपि, खाता बन्द गर्नुअघि खातामा बाँकी रहेको रकम, ऋण, कार्ड, चेकबुक वा अन्य बैंकिङ दायित्वको व्यवस्थापन भने सम्बन्धित बैंकले तोकेको प्रक्रियाअनुसार गर्नुपर्नेछ। साथै, ग्राहकको पहिचान प्रमाणीकरण र सुरक्षा मापदण्ड पालना गरेर मात्र डिजिटल माध्यमबाट खाता बन्द गर्न सकिने व्यवस्था गरिएको छ।
राष्ट्र बैंकले पछिल्ला वर्षहरूमा डिजिटल बैंकिङ सेवाको विस्तार, कागजरहित सेवा प्रवर्द्धन तथा निष्क्रिय खाताको व्यवस्थापनलाई प्राथमिकतामा राख्दै विभिन्न नीतिगत सुधार गर्दै आएको छ।