ह्युस्टन । विकल्पका रूपमा मैदान प्रवेश गरेका गाब्रियल मार्टिनेलीले इन्जुरी समयको पाँचौँ मिनेटमा निर्णायक गोल गरेपछि ब्राजिलले जापानलाई २–१ ले पराजित गर्दै फिफा विश्वकप २०२६ को अन्तिम १६ मा स्थान सुरक्षित गरेको छ।
जापानले खेलको २९औँ मिनेटमा काइशु सानोको गोलबाट अग्रता लिएको थियो। ब्राजिलका ड्यानिलोको गल्तीको फाइदा उठाउँदै उनले सशक्त प्रहारमार्फत टोलीलाई अघि बढाएका थिए। पहिलो हाफभर जापानले संगठित प्रदर्शन गर्दै ब्राजिललाई दबाबमा राखेको थियो।
दोस्रो हाफमा प्रशिक्षक कार्लो आन्सेलोटीले रणनीतिमा परिवर्तन गरेपछि ब्राजिल खेलमा फर्कियो। ५६औँ मिनेटमा कासेमिरोले गाब्रियल मागाल्हाएसको क्रसलाई हेडमार्फत जाली चुमाउँदै बराबरी गोल गरे। त्यसपछि ब्राजिलले लगातार आक्रमण गरे पनि जापानी गोलरक्षक जियोन सुजुकीले उत्कृष्ट बचाउ गर्दै टोलीलाई खेलमा कायम राखेका थिए।
खेल अतिरिक्त समयमा धकेलिने संकेत देखिइरहेका बेला ९५औँ मिनेटमा ब्रुनो गिमारेसले सिर्जना गरेको अवसरलाई मार्टिनेलीले गोलमा परिणत गर्दै ब्राजिललाई रोमाञ्चक जित दिलाए।
यस जितसँगै ब्राजिलले अन्तिम १६ मा स्थान बनाएको छ। अब उसले आइभरी कोस्ट र नर्वेमध्ये विजेतासँग प्रतिस्पर्धा गर्नेछ।