मधेश सरकार विस्तार फेरि संकटमा : मन्त्रालय भागबन्डा विवादले शपथ कार्यक्रम रोकियो

1.5k Shares

काठमाडौं । मधेश प्रदेशका मुख्यमन्त्री कृष्णप्रसाद यादवले दोस्रो दिन पनि मन्त्रिपरिषद् विस्तार गर्न सकेनन् । सत्ता गठबन्धनभित्र मन्त्रालय बाँडफाँटमा सहमति जुट्न नसक्दा मन्त्रीहरूको शपथ अन्तिम समयमा रोकिएको हो ।

आइतबार साँझदेखि सुरु भएको विवाद सोमबारसम्म जारी रह्यो । सत्ता साझेदार दल नेकपाले अर्थ मन्त्रालयसहित चार मन्त्रालयमा दाबी कायम राखेपछि सरकार विस्तार प्रक्रिया प्रभावित बनेको बताइएको छ ।

गठबन्धन दलहरूबीच भएको छलफलमा मन्त्रालयको संख्या नौमा सीमित गर्ने, एक करोडभन्दा कमका योजना नराख्ने, खुला प्रतिस्पर्धाबाट योजना कार्यान्वयन गर्ने तथा कर्मचारी सरुवाको मापदण्ड बनाउनेलगायत १३ बुँदे सहमति भएको छ ।

सहमति पश्चात् सोमबार नै सरकार विस्तार गर्ने तयारी गरिएको थियो । एमाले संसदीय दलका नेता सरोजकुमार यादव प्रस्तावित मन्त्रीहरू शारदा थापा, मनोज सिंह र लखन दासलाई लिएर मुख्यमन्त्री निवास पुगेका थिए । यसअघि नै मोहम्मद समिरले बिनाविभागीय मन्त्रीको रूपमा शपथ लिइसकेका छन् ।

गठबन्धनमा एमालेले चार मन्त्रालय, नेपाली कांग्रेसले मुख्यमन्त्रीसहित चार मन्त्रालय र नेकपाले अर्थ मन्त्रालयसहित तीन मन्त्रालय पाउने सहमति बनेको थियो । तर पछि नेकपाले थप एक मन्त्रालय माग गरेपछि विवाद चर्किएको स्रोतले जनाएको छ ।

यसबीच नेकपा अध्यक्ष केपी शर्मा ओलीले सरकार विस्तारमा हतार नगर्न सुझाव दिएपछि शपथ कार्यक्रम रोकिएको बताइएको छ । ओलीले यस विषयमा नेकपा संयोजक पुष्पकमल दाहाल ‘प्रचण्ड’सँग छलफल गर्ने बताएपछि एमालेका नेताहरू मुख्यमन्त्री निवासबाट फर्किएका थिए ।

अब मंगलबार दिउँसो एमाले अध्यक्ष ओली, प्रचण्ड र कांग्रेस उपसभापति विश्वप्रकाश शर्माबीच मधेश सरकार गठनबारे शीर्ष तहमा छलफल हुने तयारी गरिएको छ । सो छलफलपछि मात्रै सरकार विस्तारको टुंगो लाग्ने अपेक्षा गरिएको छ ।

 
 
सम्बन्धित समाचार