बिचौलिया इनम सापकोटासँग हाईप्रोफाइल व्यक्तिको कनेक्सन खुल्दै, सरकार कारबाहीको तयारीमा

925 Shares

काठमाडौं । बिचौलिया इनम सापकोटासँग उच्चपदस्थ सरकारी अधिकारी, न्यायालयका पदाधिकारी, सुरक्षा निकायका प्रमुख, राजनीतिक व्यक्ति तथा व्यवसायीहरूको सम्बन्ध सार्वजनिक हुन थालेपछि सरकार थप सक्रिय बनेको छ। सापकोटाको मोबाइल फोनबाट प्राप्त विवरणका आधारमा विभिन्न क्षेत्रका प्रभावशाली व्यक्तिहरूसँगको सम्पर्क र संवादबारे अनुसन्धान अघि बढाइएको छ।

सापकोटासँग पूर्वप्रधानन्यायाधीश चोलेन्द्रशमशेर जबरा, बहालवाला न्यायाधीश, प्रहरीका उच्च अधिकारी, सशस्त्र प्रहरीका अधिकारी तथा राजनीतिक व्यक्तिहरूको सम्पर्क देखिएको विवरण सार्वजनिक भएका छन्। यससँगै न्यायपालिका र सुरक्षा निकायको भूमिकामाथि समेत प्रश्न उठ्न थालेको छ।

प्रहरीले सापकोटामाथि अनुसन्धान गर्न प्रहरी उपरीक्षक (एसपी) नरहरि रेग्मीको नेतृत्वमा छुट्टै समिति गठन गरेको छ। उक्त समितिले जिल्ला प्रहरी परिसर काठमाडौंको हिरासतमा रहेका सापकोटामाथिको अनुसन्धानलाई थप व्यवस्थित बनाउने र विभिन्न व्यक्तिसँगको सम्पर्कबारे छानबिन गर्ने जिम्मेवारी पाएको छ।

सापकोटाको मोबाइलको फरेन्सिक परीक्षणका क्रममा उच्चपदस्थ व्यक्तिहरूसँग भएका ह्वाट्सएप संवाद तथा अन्य सम्पर्क विवरण फेला परेको बताइएको छ। उनीसँग न्यायालयका पदाधिकारीदेखि नेपाल प्रहरी र सशस्त्र प्रहरीका उच्च अधिकारीसम्मको सम्पर्क देखिएको विवरण सार्वजनिक भएका छन्।

यसैबीच, सर्वोच्च अदालतका प्रधानन्यायाधीश मनोजकुमार शर्मा र न्यायाधीश हरिप्रसाद फुयालसँग सम्बन्धित विवरण पनि सार्वजनिक भएपछि न्यायालय थप विवादमा तानिएको छ। केही सार्वजनिक विवरणमा आर्थिक कारोबार तथा सर्वोच्च अदालतमा विचाराधीन मुद्दाका विषयमा संवाद भएको दाबी गरिएको छ।

तर प्रधानन्यायाधीश शर्माले आफूलाई जोडेर सार्वजनिक भएका आरोप अस्वीकार गरेका छन्। उनले सम्बन्धित व्यक्तिहरूसँग आफ्नो कुनै प्रत्यक्ष वा अप्रत्यक्ष सम्पर्क तथा भेटघाट नरहेको स्पष्ट पारेका छन्। त्यसैगरी, सार्वजनिक भएका विवरणलाई अन्तिम प्रमाणका रूपमा लिन नहुने र निष्पक्ष अनुसन्धान हुनुपर्ने आवाज पनि उठिरहेको छ।

यस प्रकरणमा राष्ट्रिय स्वतन्त्र पार्टीका सांसद तथा पूर्वप्रहरी अतिरिक्त महानिरीक्षक विश्वराज पोखरेलको नामसमेत जोडिएको छ। उनले पनि बिचौलिया सापकोटासँग आफ्नो कुनै चिनजान, सम्पर्क वा आर्थिक कारोबार नरहेको भन्दै सार्वजनिक आरोपको खण्डन गरेका छन्।

यसअघि सापकोटासँग सम्पर्क देखिएको विषयमा सशस्त्र प्रहरीका अतिरिक्त महानिरीक्षक वंशी दाहालमाथि समेत कारबाही भएको थियो। अनुसन्धानका क्रममा अन्य उच्चपदस्थ अधिकारीहरूको नामसमेत जोडिन थालेपछि सरकारले घटनालाई गम्भीर रूपमा लिएको बताइएको छ।

सापकोटा असोज १४ गते त्रिभुवन अन्तर्राष्ट्रिय विमानस्थलबाट भारत जान लागेको अवस्थामा पक्राउ परेका थिए। उनीमाथि नेपाल राष्ट्र बैंक ऐन तथा सम्पत्ति शुद्धीकरणसम्बन्धी कसुरमा समेत अनुसन्धान भइरहेको छ।

सरकारले यस प्रकरणमा जोडिएका व्यक्तिहरूको भूमिकाबारे अनुसन्धान अघि बढाइरहेको छ। सार्वजनिक भएका आरोप पुष्टि भएमा पद र प्रभावको पर्वाह नगरी कानुनी कारबाही हुनुपर्ने माग उठिरहेको छ।

यद्यपि, अनुसन्धानको निष्कर्ष नआएसम्म सार्वजनिक भएका आरोपलाई प्रमाणित कसुरका रूपमा लिन मिल्दैन। यस प्रकरणमा संलग्न भनिएका व्यक्तिहरूको वास्तविक भूमिका र सम्भावित आर्थिक कारोबारबारे प्रहरी अनुसन्धानपछि थप तथ्य बाहिर आउने अपेक्षा गरिएको छ।

सम्बन्धित समाचार