काठमाडौं । मलेसियाका लागि प्रस्तावित राजदूत चुडामणी खरेलको नाम पनि अस्वीकृत भएको छ ।
संसदीय सुनुवाइ समितिबाट आज उनको नाम भावी राजदुतका लागि अस्वीकृत भएको हो । मुख्य गरी समितिमा रास्वपा सांसद राजिव खत्रीले उनीमाथि विभिन्न आरोप सहितको प्रश्न उठाएका थिए ।
संसदीय सुनुवाइ समितिमा मलेसियाका लागि प्रस्तावित राजदूत चुडामणि खरेलमाथि रास्वपा सांसद राजीव खत्री लगायतबाट विभिन्न गम्भीर आरोपहरू उठाइएका थिए। उनीमाथि लागेका प्रमुख आरोपहरू यस्ता रहेका छन ।
आर्थिक लेनदेन र ठगीको आरोप: विभिन्न अनुदान तथा काम मिलाइदिने भन्दै मानिसहरूसँग लाखौँ रुपैयाँ आर्थिक लेनदेन तथा ठगी गरेको।
जग्गा कारोबारमा अनियमितता: सार्वजनिक तथा तराई–मधेसका विभिन्न जग्गाको कारोबारमा चलखेल गरी करोडौँ रकम असुल गरेको र यसमा संलग्नता देखिएको।
म्यानपावर व्यवसायीसँगको अनुचित सम्बन्ध (स्वार्थको द्वन्द्व): वैदेशिक रोजगारीसँग प्रत्यक्ष जोडिने मलेसियाको राजदूत बन्न लागेका खरेलको म्यानपावर व्यवसायीहरूसँग हिमचिम र अनुचित साँठगाँठ रहेको।
बेरुजु र अन्य विवाद: विभिन्न संघसंस्थामा काम गर्दा उनको नाममा लाखौँ रुपैयाँ बेरुजु रहेको।
प्रस्तावित राजदूत खरेलले भने आफूमाथि लगाइएका ती सबै आरोपहरू पूर्ण रूपमा निराधार र गलत भएको दाबी गर्दै खण्डन गरेका थिए।