सांसद सुनारको कार्यशैलीमाथि प्रश्न, ‘राइट टु रिकल’ प्रक्रिया अघि बढाउन माग

1.4k Shares

रुपन्देही । राष्ट्रिय स्वतन्त्र पार्टी (रास्वपा) का सांसद खगेन्द्र सुनारलाई फिर्ता बोलाउन माग गर्दै पार्टी नेतृत्वसमक्ष लिखित पत्र बुझाइएको छ। बाँके निर्वाचन क्षेत्र नम्बर ३ बाट निर्वाचित सांसद सुनारको कार्यशैलीप्रति असन्तुष्टि जनाउँदै पार्टीभित्रैबाट यस्तो माग उठाइएको हो।

 
रास्वपाका केन्द्रीय विधायन मन्थन विभागका सदस्य विक्रम ओलीले प्रधानमन्त्री एवं पार्टी संसदीय दलका नेता वालेन्द्र शाहलाई सम्बोधन गर्दै पत्र बुझाएका हुन्।

पत्रमा सांसद सुनार नियमित रूपमा आफ्नो निर्वाचन क्षेत्रमा नफर्किएको, स्थानीय जनताका समस्या समाधानमा पर्याप्त ध्यान नदिएको तथा विवादित अभिव्यक्ति दिएको आरोप लगाइएको छ। यी आरोपको निष्पक्ष छानबिन गरी आवश्यक कारबाही गर्न पनि पत्रमार्फत माग गरिएको छ।

त्यसैगरी, सांसद सुनारको गतिविधिबारे छानबिन गरी पार्टीको ‘राइट टु रिकल’ अर्थात् निर्वाचित प्रतिनिधिलाई फिर्ता बोलाउने प्रक्रिया अघि बढाउन आग्रह गरिएको छ।

ज्ञापनपत्रमा निर्वाचन क्षेत्रका नागरिकको अपेक्षाअनुसार काम हुन नसके आगामी स्थानीय तहको निर्वाचनमा पार्टीले राजनीतिक क्षति व्यहोर्न सक्ने चिन्तासमेत व्यक्त गरिएको छ।

यद्यपि, पत्रमा लगाइएका आरोपबारे सांसद खगेन्द्र सुनारको प्रतिक्रिया समाचारमा समावेश गरिएको छैन।

सम्बन्धित समाचार