काठमाडौँ । लगातारको वर्षाका कारण कान्तिलोकपथ सडकखण्डमा दुई ठाउँमा पहिरो खसेपछि यातायात प्रभावित भएको छ। पहिरोका कारण सडक अवरुद्ध भएपछि सम्बन्धित निकायले पहिरो पन्छाएर सडक सञ्चालनमा ल्याउने प्रयास गरिरहेको छ।
प्रहरीका अनुसार कान्तिलोकपथअन्तर्गत ललितपुरतर्फका विभिन्न स्थानमा वर्षासँगै पहिरो खसेको हो। यसअघि पनि बिर्खेधारा, पाङ्दुर र टाकुर्चे क्षेत्रमा पहिरो खसेपछि सडकमा यातायात प्रभावित भएको थियो।
लगातारको वर्षाका कारण कान्तिलोकपथका अन्य जोखिमयुक्त क्षेत्रमा समेत पहिरो खस्ने सम्भावना रहेको जनाइएको छ। कान्तिलोकपथ आयोजनाका अनुसार सडकका विभिन्न २७ स्थानलाई पहिरोको जोखिमयुक्त क्षेत्रका रूपमा पहिचान गरिएको छ।
भैँसेखोला, बिर्खेधारा, नयाँगाउँ, कार्कीबास, टाकुर्चे, पाङ्दुर, तामाखानी, काल्चे र माल्टा दोबाटोलगायत क्षेत्रमा पहिरोको जोखिम रहेको आयोजनाले जनाएको छ। जोखिम भएका स्थानमा पहिरो हटाउन स्काभेटरलगायतका उपकरण तयारी अवस्थामा राखिएको छ।
यसअघि ललितपुरको बागमती गाउँपालिका–३ काल्चेमाल्टा दोबाटोमा पहिरो खसेपछि कान्तिलोकपथ पूर्ण रूपमा अवरुद्ध भएको थियो। पहिरोका कारण दुवैतर्फको सडक बन्द भएको प्रहरीले जनाएको थियो।
लगातारको वर्षाका कारण सडकमा पहिरो खस्ने जोखिम कायमै रहेकाले यात्रुलाई यात्रा गर्नुअघि सडकको अवस्था बुझेर मात्रै आवतजावत गर्न आग्रह गरिएको छ। वर्षा जारी रहेमा सडक पुनः अवरुद्ध हुन सक्ने भएकाले सम्बन्धित निकायले आवश्यक सतर्कता अपनाउन आग्रह गरेका छन्।