कर्ण थापा र ठाकुर गैरेले ओलीको कार्यशैलीमाथि प्रश्न उठाए

988 Shares

काठमाडौं । नेकपा एमालेको केन्द्रीय कमिटी बैठकमा नेताहरूले पार्टी अध्यक्ष केपी शर्मा ओलीको कार्यशैली र पार्टी सञ्चालनको तौरतरिकामाथि प्रश्न उठाएका छन्। केन्द्रीय सदस्य कर्ण थापा र ठाकुर गैरेले पार्टीभित्र देखिएका समस्या समाधानका लागि नेतृत्व तथा संगठन सञ्चालनको शैलीमा सुधार आवश्यक रहेको धारणा राखेका छन्।

कर्ण थापाले आफ्नो २६ पृष्ठ लामो असहमतिको दस्तावेज बैठकमा छलफलका लागि प्रस्तुत गर्न माग गरेका छन्। उनले नेतृत्व हस्तान्तरणलाई सहज बनाउन पार्टीको शीर्ष पदमा लगातार दुई कार्यकालभन्दा बढी बस्न नपाउने र ७० वर्षको उमेर हद कायम गर्नुपर्ने प्रस्ताव अघि सारेका छन्। 

थापाले पार्टीभित्र स्वस्थ नेतृत्व विकासका लागि स्पष्ट प्रणाली आवश्यक रहेको बताएका छन्। उनका अनुसार नेतृत्व परिवर्तनलाई व्यवस्थित बनाउन नसक्दा अस्वस्थ प्रतिस्पर्धा र गुटगत गतिविधि बढ्न सक्ने भएकाले वैकल्पिक नेतृत्व विकास गर्ने वातावरण बनाउनुपर्ने आवश्यकता छ।

त्यस्तै, नेता ठाकुर गैरेले नेताहरूबीच हुने आपसी सम्झौता वा समझदारी मात्रबाट पार्टीका समस्या समाधान नहुने धारणा राखेका छन्। उनले निर्वाचनपछि स्थानीय तहदेखि विभिन्न कमिटी र कार्यकर्ताबाट आएका भावना, माग तथा सुझावलाई समेटेर एकीकृत प्रतिवेदन तयार गर्नुपर्ने बताएका छन्।

एमालेको बैठकमा पार्टी पुनर्गठन, निर्वाचनमा देखिएका कमजोरी तथा आगामी रणनीतिबारे छलफल भइरहेको छ। यसअघि निर्वाचन समीक्षा कार्यदलले पनि पार्टीको पराजयका कारणबारे विभिन्न सुझाव संकलन गरेको थियो। कार्यदलमा नेतृत्वको कार्यशैली र निर्णय प्रक्रियासम्बन्धी विषयसमेत उठेको थियो। 

यसैबीच, अध्यक्ष ओलीले भने पार्टी नेतृत्वमाथि सार्वजनिक रूपमा आलोचना गर्ने प्रवृत्तिप्रति असन्तुष्टि जनाएका छन्। उनले पार्टीभित्रका विषय कमिटी र बैठकमै छलफल गर्नुपर्ने बताउँदै सार्वजनिक माध्यमबाट नेतृत्व परिवर्तनको माग गर्नु उचित नभएको धारणा व्यक्त गरेका छन्। 

केन्द्रीय कमिटी बैठकमा नेताहरूले राखेका फरक–फरक धारणाले एमालेभित्र पार्टी पुनर्गठन, नेतृत्व हस्तान्तरण र संगठन सञ्चालनको विषयमा बहस जारी रहेको देखिएको छ।

 
 
सम्बन्धित समाचार