काठमाडौं । नेकपा एमालेका अध्यक्ष केपी शर्मा ओलीले पार्टी र नेतृत्वविरुद्ध जनतामा फैलिएको भ्रम चिर्दै अघि बढ्नुपर्ने बताएका छन्। एमाले केन्द्रीय कमिटी बैठकलाई सम्बोधन गर्दै ओलीले जनतासँगको सम्बन्ध थप सुदृढ बनाउन र पार्टीप्रति रहेको भ्रम हटाउनुपर्नेमा जोड दिएका हुन्।
उनले पार्टीभित्र अनुशासन कायम राख्दै संगठनलाई थप व्यवस्थित र सक्रिय बनाउनुपर्ने धारणा राखे। जनतामा एमालेबारे उत्पन्न भएका गलत बुझाइलाई तथ्य र काममार्फत स्पष्ट पार्नुपर्ने उनको भनाइ थियो।
ओलीले पार्टीका नेता–कार्यकर्तालाई आपसी एकता कायम गर्दै संगठन निर्माणमा केन्द्रित हुन आग्रह गरे। उनले जनतासँग निरन्तर संवाद र सम्पर्क बढाएर पार्टीका नीति तथा कामबारे जानकारी गराउनुपर्ने बताए।
यसै क्रममा ओलीले पछिल्लो राजनीतिक परिस्थितिबारे समेत धारणा राख्दै सरकारका गतिविधिको आलोचना गरे। उनले आफूहरूले उठाएका विषयमा पार्टीले राजनीतिक रूपमा निरन्तर आवाज उठाउने बताए।
एमालेको केन्द्रीय कमिटी बैठकमा पार्टीको सांगठनिक अवस्था, निर्वाचन समीक्षा तथा पुनर्संरचनासम्बन्धी कार्यदलको प्रतिवेदनलगायत विषयमा छलफल भइरहेको छ। बैठकले आगामी राजनीतिक तथा सांगठनिक कार्यदिशाबारे समेत निर्णय गर्ने तयारी गरेको छ।