एमालेले अझै गठन गरेन स्थायी कमिटी र पोलिटब्युरो

736 Shares

काठमाडौं । नेकपा एमालेले नयाँ केन्द्रीय नेतृत्व चयन भएको लामो समय बितिसक्दा पनि पार्टीको स्थायी कमिटी र पोलिटब्युरो गठन गर्न सकेको छैन। पार्टीभित्र सांगठनिक पुनर्संरचना र नेतृत्वसम्बन्धी विषयमा छलफल चलिरहेका बेला यी दुई महत्वपूर्ण संरचना गठन हुन नसकेका हुन्।

एमालेको हालै बसेको निर्वाचन समीक्षा तथा पार्टी पुनर्संरचना कार्यदलले तत्काल नेतृत्व पुनर्संरचनाको विषयलाई प्राथमिकतामा नराख्ने निर्णय गरेको छ। कार्यदलले विभिन्न नेताहरूले तयार पारेका प्रतिवेदनलाई समेटेर साझा प्रतिवेदन तयार गरी पार्टी सचिवालयमा बुझाउने निर्णय गरेको थियो। 

कार्यदलले विशेष महाधिवेशन तत्काल नबोलाउने र नियमित विधान महाधिवेशनमार्फत पार्टीका विभिन्न विषय टुंगो लगाउने दिशामा छलफल अघि बढाएको छ। ७० वर्षे उमेरहद तथा दुई कार्यकालको व्यवस्थासम्बन्धी विषय पनि आगामी नियमित विधान महाधिवेशनमा एजेन्डाका रूपमा लैजान सकिने बताइएको छ। 

पार्टीभित्र नेतृत्व पुनर्संरचनाको विषयमा विभिन्न धारणा सार्वजनिक भए पनि पछिल्लो कार्यदल बैठकले तत्काल त्यसलाई अघि नबढाउने निष्कर्ष निकालेको छ। कार्यदलले पार्टीलाई थप एकताबद्ध बनाउँदै आगामी निर्वाचन तथा सरकारविरुद्धको राजनीतिक गतिविधिमा केन्द्रित हुने विषयमा जोड दिएको छ। 

यसैबीच एमालेले राष्ट्रिय प्रतिनिधि परिषद्को बैठक बोलाउन पार्टीलाई सिफारिस गर्ने निर्णय गरेको छ। १५ सदस्यीय कार्यदलले सर्वसम्मत रूपमा यस्तो सिफारिस गर्ने निर्णय गरेको सचिव महेश बस्नेतले जानकारी दिएका छन्।

स्थायी कमिटी र पोलिटब्युरो गठनलगायत सांगठनिक विषय भने पार्टी सचिवालय तथा केन्द्रीय कमिटीको आगामी छलफलबाट अघि बढ्ने देखिएको छ। पछिल्लो समय एमालेभित्र पार्टी पुनर्संरचना, नेतृत्वको भूमिका र आगामी राजनीतिक रणनीतिबारे बहस जारी छ। 

सम्बन्धित समाचार