काठमाडौं । नेपाली कांग्रेसले १५औँ महाधिवेशनअन्तर्गतका अधिवेशन प्रक्रिया अघि बढाउन नमान्ने चार जिल्लाका सभापतिको जिम्मेवारी खोसेको छ। पार्टीले कञ्चनपुर, मुगु, डोटी र बागलुङका जिल्ला सभापतिलाई जिम्मेवारीबाट हटाएर उनीहरूको स्थानमा कार्यवाहक सभापति तोकेको हो।
कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालका अनुसार महाधिवेशन प्रक्रिया अघि बढाउन असहयोग गरेको भन्दै चार जिल्लाका सभापतिको जिम्मेवारी परिवर्तन गरिएको हो। जिम्मेवारी खोसिने सभापतिहरू पूर्वसभापति शेरबहादुर देउवानिकट मानिन्छन्।
पार्टीले कञ्चनपुरका सभापति पदम बोगटीलाई हटाएर हरिचन्द्र राना, मुगुका सभापति ऐनबहादुर शाहीको स्थानमा हरिजंग शाही, डोटीका सभापति नरेन्द्रबहादुर सिंहको ठाउँमा नारायणबहादुर बलायर र बागलुङका सभापति जित शेरचनको जिम्मेवारी तारानाथ पौडेललाई दिएको छ।
कांग्रेसभित्र १५औँ महाधिवेशनको प्रक्रिया अघि बढाउने विषयलाई लिएर पछिल्लो समय विवाद देखिँदै आएको छ। संस्थापन पक्षले तोकिएको कार्यतालिकाअनुसार अधिवेशन प्रक्रिया अघि बढाउनुपर्ने बताउँदै आएको छ भने केही जिल्ला सभापतिले पार्टीभित्र सहमति कायम गरेर मात्रै प्रक्रिया अघि बढाउनुपर्ने धारणा राख्दै आएका छन्।
चार जिल्ला सभापतिको जिम्मेवारी परिवर्तनलाई पार्टी संस्थापन पक्षले महाधिवेशन प्रक्रिया अघि बढाउने निर्णय कार्यान्वयन गराउने कदमका रूपमा लिएको छ। यस निर्णयसँगै कांग्रेसभित्र महाधिवेशनको विषयलाई लिएर देखिएको आन्तरिक विवाद थप सतहमा आएको छ।
पार्टीले भने जिल्ला तहमा महाधिवेशनसम्बन्धी बाँकी प्रक्रिया निर्धारित विधि र कार्यतालिकाअनुसार अघि बढाउने तयारी गरेको छ।