काठमाडौं । नेकपा एमालेले संविधान दिवसलाई भव्य रूपमा मनाउन पार्टीका मातहतका कमिटीलाई निर्देशन दिएको छ। पार्टीले संविधान दिवसका अवसरमा विभिन्न कार्यक्रम आयोजना गरी दिवस मनाउन सर्कुलर जारी गरेको हो।
एमालेले संविधान दिवसलाई राष्ट्रिय महत्त्वको अवसरका रूपमा लिएर देशभर कार्यक्रम गर्न पार्टीका नेता तथा कार्यकर्तालाई आग्रह गरेको छ। विभिन्न तहका कमिटीले स्थानीय परिस्थिति र आवश्यकताअनुसार कार्यक्रम आयोजना गर्ने तयारी गरेका छन्।
संविधान जारी भएको दिन असोज ३ गतेलाई राष्ट्रिय दिवसका रूपमा मनाइँदै आएको छ। यस अवसरमा सरकारी तथा विभिन्न संघसंस्थाले समेत कार्यक्रम आयोजना गर्दै आएका छन्।
एमालेले संविधानको महत्व र यसले सुनिश्चित गरेका राजनीतिक तथा नागरिक अधिकारबारे जनस्तरमा जानकारी गराउँदै दिवसलाई व्यापक सहभागितासहित मनाउनुपर्नेमा जोड दिएको छ।