काठमाडौं । अमेरिकी विदेशमन्त्री मार्को रुबियोले राष्ट्रिय स्वतन्त्र पार्टी (रास्वपा) का सभापति रवि लामिछानेलाई टेलिफोन गरी रसुवामा आएको विनाशकारी बाढीबाट भएको जनधनको क्षतिप्रति दुःख व्यक्त गरेका छन्।
रुबियोले टेलिफोन संवादका क्रममा बाढीमा परी ज्यान गुमाएकाहरूप्रति समवेदना व्यक्त गर्दै विपत्तिको कठिन घडीमा नेपाल र नेपाली जनताप्रति अमेरिकी सरकारको ऐक्यबद्धता रहेको बताएका हुन्।
टेलिफोन कुराकानीका क्रममा रास्वपा सभापति लामिछानेले रसुवा बाढीपछि सरकारले खोजी, उद्धार तथा राहतका कामलाई तीव्रता दिएको जानकारी रुबियोलाई गराएका थिए।
उनले विपत्तिपछि उपलब्ध सबै स्रोतसाधन परिचालन गरेर प्रभावित क्षेत्रमा उद्धार तथा राहतको काम भइरहेको बताएका थिए। बाढीबाट प्रभावित तथा सम्पर्कविहीन नागरिकको खोजीलाई प्राथमिकतामा राखिएको पनि उनले जानकारी गराएको रास्वपाले जनाएको छ।
लामिछानेले नेपालमा रहेका विदेशी नागरिकको सुरक्षा सुनिश्चित गर्न पनि सरकार समान रूपमा प्रतिबद्ध रहेको बताएका थिए।
बाढीका कारण नेपाली नागरिकसँगै नेपालमा रहेका विदेशी नागरिकसमेत प्रभावित हुन सक्ने अवस्थालाई ध्यानमा राखेर उनीहरूको खोजी, उद्धार तथा सुरक्षाका लागि आवश्यक व्यवस्था मिलाइएको उनले जानकारी गराएका थिए।
टेलिफोन वार्ताका क्रममा लामिछानेले विपत्तिको समयमा अमेरिकाले नेपाललाई गरेको सहयोगप्रति अमेरिकी सरकारलाई धन्यवाद दिएका थिए।
नेपालमा आएको प्राकृतिक विपत्तिप्रति अमेरिकी पक्षले देखाएको चासो र सहानुभूतिका लागि उनले आभार व्यक्त गर्दै कठिन परिस्थितिमा अन्तर्राष्ट्रिय सहयोगले राहत तथा उद्धार कार्यमा थप सहयोग पुग्ने धारणा राखेका थिए।
रास्वपाका अनुसार अमेरिकी विदेशमन्त्री रुबियोले बाढीबाट भएको क्षतिप्रति दुःख व्यक्त गर्दै नेपालका जनता तथा सरकारसँग अमेरिकी सरकारको ऐक्यबद्धता रहेको स्पष्ट पारेका थिए।