रसुवा । चीनसँगको उत्तरी सीमा जोडिएको रसुवाको केरुङ नाकाबाट नेपाल भित्रिएका तथा भन्सार क्षेत्रमा राखिएका अर्बौं रुपैयाँ मूल्य बराबरका मालसामान बाढीले बगाएको छ। भोटेकोशी नदीमा आएको भीषण बाढीका कारण रसुवा भन्सार कार्यालय आसपासका क्षेत्रमा ठूलो क्षति पुगेको हो।
बाढीले भन्सार क्षेत्रमा पार्किङ गरिएका कन्टेनर, मालवाहक सवारीसाधन तथा विभिन्न व्यवसायीका सामानमा क्षति पुर्याएको बताइएको छ। अचानक आएको बाढीले ठूलो क्षेत्रमा क्षति पुर्याएपछि भन्सारमा रहेका कतिपय सामानको यकिन विवरणसमेत संकलन गर्न कठिन भएको छ।
बाढीका कारण केरुङ नाकाबाट नेपालतर्फ आएका धेरै कन्टेनर तथा मालवाहक सवारीसाधनसमेत प्रभावित भएका छन्। केही सवारीसाधन बाढीले बगाएको र केही क्षतिग्रस्त अवस्थामा रहेको जनाइएको छ। ती सवारीसाधनमा रहेका चालक तथा व्यवसायीसँग पनि सम्पर्क हुन नसकेको बताइएको छ।
विपत्तिपछि प्रभावित क्षेत्रमा उद्धार तथा खोजी कार्य तीव्र पारिएको छ। नेपाली सेना, नेपाल प्रहरी र सशस्त्र प्रहरीसहितका सुरक्षाकर्मी परिचालन गरी बेपत्ता भएका व्यक्ति तथा प्रभावितको खोजी भइरहेको छ। तर, लगातारको जोखिम र भौगोलिक कठिनाइका कारण उद्धार तथा खोजी कार्य चुनौतीपूर्ण बनेको छ।
भन्सार क्षेत्रमा भएको क्षतिको पूर्ण विवरण भने अझै सार्वजनिक हुन सकेको छैन। बाढीले भन्सार कार्यालय, गोदाम, पार्किङ क्षेत्रमा रहेका सवारीसाधन तथा मालसामानमा ठूलो क्षति पुर्याएको प्रारम्भिक विवरण आए पनि क्षतिको आर्थिक मूल्यांकन हुन बाँकी छ।
व्यवसायीहरूले भन्सार परिसर तथा आसपासमा लामो समयदेखि रोकिएका सामानसमेत बाढीले बगाएको बताएका छन्। करोडौँ रुपैयाँ मूल्यका सामान क्षति भएपछि व्यवसायीहरू थप चिन्तित बनेका छन्। बाढीका कारण व्यापारिक गतिविधिसमेत प्रभावित भएको छ।
यसैबीच, सम्बन्धित निकायले प्रभावित क्षेत्रमा तत्काल उद्धार तथा राहतलाई प्राथमिकता दिएको जनाएको छ। बेपत्ता चालक तथा व्यवसायीको खोजीका साथै बाढीले क्षति पुर्याएका सवारीसाधन र मालसामानको विवरण संकलन गर्ने काम पनि अघि बढाइने बताइएको छ।
बाढीका कारण रसुवाको उत्तरी सीमा क्षेत्र र भन्सार नाकाको नियमित आवागमन तथा व्यापारिक गतिविधिमा समेत असर परेको छ। क्षतिको विस्तृत विवरण खोज तथा उद्धार कार्यपछि मात्र यकिन हुने अधिकारीहरूले बताएका छन्।