नयाँ दिल्ली । इन्डियन प्रिमियर लिग (आईपीएल) अन्तर्गत भएको रोमाञ्चक खेलमा दिल्ली क्यापिटल्सले राजस्थान रोयल्सलाई ५ विकेटले पराजित गरेको छ । जितका लागि १९४ रनको लक्ष्य पछ्याएको दिल्लीले ४ बल बाँकी रहँदा ५ विकेट गुमाएर लक्ष्य पूरा गरेको हो ।
दिल्लीको जितमा ओपनर अभिषेक पोरेल र केएल राहुलले उत्कृष्ट अर्धशतकीय इनिङ खेले । उनीहरूको साझेदारीले टोलीलाई बलियो अवस्थामा पुर्याएको थियो । अन्तिमतिर मध्यक्रमका ब्याटरहरूले संयमित खेल प्रदर्शन गर्दै टोलीलाई जित दिलाए ।
यसअघि टस हारेर पहिले ब्याटिङ गरेको राजस्थान रोयल्सले निर्धारित २० ओभरमा १९३ रन बनाएको थियो । राजस्थानका लागि वैभव सूर्यवंशी, ध्रुव जुरेल र कप्तान रियान परागले आक्रामक ब्याटिङ गर्दै टोलीलाई प्रतिस्पर्धात्मक योगफलसम्म पुर्याएका थिए ।
दिल्लीका तीव्र गतिका बलर मिचेल स्टार्कले उत्कृष्ट बलिङ गर्दै ४ विकेट लिए । उनले महत्वपूर्ण समयमा विकेट निकाल्दै राजस्थानलाई ठूलो स्कोर बनाउनबाट रोकेका थिए । उत्कृष्ट प्रदर्शनकै कारण स्टार्क ‘प्लेयर अफ द म्याच’ घोषित भए ।
यस जितसँगै दिल्ली क्यापिटल्स अंक तालिकाको सातौं स्थानमा उक्लिएको छ भने राजस्थान रोयल्स छैटौं स्थानमा झरेको छ ।