लिग–२ मा निर्णायक मोड- शीर्ष दुई टोलीविरुद्ध नेपालको कठिन परीक्षा

1k Shares

काठमाडौँ । नेपाल क्रिकेट संघले आयोजना गर्न लागेको आईसीसी विश्वकप लिग–२ अन्तर्गतको त्रिकोणात्मक सिरिज नेपाली क्रिकेटका लागि निकै महत्वपूर्ण मानिएको छ । घरेलु मैदान कीर्तिपुरमा हुने सिरिजमा नेपालले अंकतालिकाको शीर्ष दुई टोली अमेरिका र स्कटल्यान्डसँग प्रतिस्पर्धा गर्दैछ ।

हाल नेपाल लिग–२ को अंकतालिकामा पुछारबाट दोस्रो स्थानमा छ। नेपालले २० खेलबाट १२ अंक मात्र जोडेको छ भने अमेरिका ३६ अंकसहित शीर्ष स्थानमा र स्कटल्यान्ड ३४ अंकसहित दोस्रो स्थानमा रहेका छन् । त्यसैले नेपालका लागि यो सिरिज केवल प्रतिस्पर्धा मात्र नभई ओडीआई मान्यता जोगाउने र विश्वकप छनोटको सम्भावना कायम राख्ने ठूलो अवसर पनि बनेको छ ।

नेपालले यसअघि यूएई र ओमानविरुद्धको घरेलु सिरिजमा राम्रो प्रदर्शन गर्दै आत्मविश्वास बढाएको थियो। चार खेलमध्ये तीन खेलमा जित निकाल्दै टोलीले सकारात्मक संकेत दिएको थियो । अब त्यो लयलाई अमेरिका र स्कटल्यान्डजस्ता बलिया टोलीविरुद्ध कायम राख्नु नेपाली टोलीको मुख्य चुनौती हुनेछ ।

विशेषगरी नेपाल ‘ए’ टोलीले हालै अमेरिका र स्कटल्यान्डविरुद्ध अभ्यास खेलमा प्रभावशाली प्रदर्शन गरेपछि सिनियर टोलीमाथि अपेक्षा अझ बढेको छ। नेपाल ‘ए’ले दुवै टोलीलाई हराएको अनुभवले समर्थकमा उत्साह थपिएको छ भने सिनियर टोलीमाथि दबाब पनि बढेको विश्लेषण भइरहेको छ ।

कप्तान रोहित पौडेलको नेतृत्वमा रहेको नेपाली टोलीमा अनुभवी र युवा खेलाडीको मिश्रण देखिन्छ। टोलीमा सन्दीप लामिछाने, दीपेन्द्रसिंह ऐरी, कुशल भुर्तेल लगायतका मुख्य खेलाडी रहेका छन् भने इशान पाण्डे सात वर्षपछि राष्ट्रिय टोलीमा फर्किएका छन् ।

विश्लेषकहरूका अनुसार घरेलु मैदान नेपालको सबैभन्दा ठूलो बल बन्न सक्छ । कीर्तिपुरको पिच, समर्थकको साथ र स्थानीय अवस्थाबारेको अनुभव नेपालका पक्षमा हुन सक्छ । तर अमेरिका र स्कटल्यान्ड दुवै टोली पछिल्ला वर्षमा निरन्तर राम्रो प्रदर्शन गर्दै आएका कारण नेपालले गल्ती गर्ने अवसर निकै कम हुनेछ ।

नेपालले अबका खेलमा जित निकाल्न सके अंकतालिकामा सुधार गर्दै शीर्ष ४ को दौडमा फर्किन सक्नेछ । तर कमजोर प्रदर्शन भए नेपालमाथि ओडीआई मान्यता जोगाउने दबाब अझ बढ्ने देखिन्छ। त्यसैले यो सिरिजलाई नेपाली क्रिकेटको आगामी दिशा तय गर्ने निर्णायक मोडका रूपमा हेरिएको छ ।

सम्बन्धित समाचार