काठमाण्डौ । च्याम्पियन्स लिगअन्तर्गत क्वार्टरफाइनल दोस्रो लेगमा बायर्न म्युनिखले रियल म्याड्रिडलाई ४-३ ले हराउँदै समग्रमा ६-४ को जितसहित सेमिफाइनलमा स्थान बनाएको छ । गए राति भएको खेल अत्यन्त रोमाञ्चक रह्यो । सात गोल, दुई रातो कार्ड र अन्तिम मिनेटसम्मको तनावले भरिएको यस खेलमा बायर्नले ४-३ को नतिजा निकालेको हो ।
खेल सुरु भएको ३५ सेकेन्डमै रियल म्याड्रिडले गोल गर्दै सनसनीपूर्ण सुरुवात गरेको थियो । टर्कीका युवा खेलाडी आर्डा गुलरले बायर्नका गोलकिपर म्यानुएल नोयरको गल्तीको फाइदा उठाउँदै टाढाबाट शानदार प्रहार गर्दै गोल गरे ।
तर बायर्नले छिट्टै जवाफ फर्कायो । एलेक्जान्डर पाभ्लोभिचले कर्नरबाट आएको बललाई हेडमार्फत जाली चुमाउँदै खेल बराबरीमा ल्याए । पहिलो हाफ अत्यन्तै आक्रामक रह्यो, जहाँ दुवै टोलीले लगातार आक्रमण गर्दै थप गोल गरे ।
ह्यारी केनले आफ्नो उत्कृष्ट फर्म जारी राख्दै सिजनको ५०औँ गोल गरे भने केलियन एमबाप्पेले पनि शानदार गोल गर्दै खेललाई थप रोमाञ्चक बनाए । पहिलो हाफ सकिँदा खेल २-२ को बराबरीमा थियो ।
दोस्रो हाफ शान्त देखिए पनि अन्तिम केही मिनेटमा नाटकीय मोड आयो । खेल अतिरिक्त समयमा जाने संकेत देखिएका बेला रियलका एडुआर्डो कामाभिङ्गाले दोस्रो पहेँलो कार्ड पाएपछि रातो कार्ड भोगे । उनको बहिर्गमनले खेलको दिशा बदल्यो ।
संख्यात्मक फाइदा उठाउँदै बायर्नले अन्तिम क्षणमा दुई गोल गर्यो । लुइस डियाजले ८९औँ मिनेटमा निर्णायक गोल गरे भने माइकल ओलिसेले इन्जुरी समयमा अर्को गोल थप्दै जित सुनिश्चित गरे ।
खेलपछि विवाद पनि चर्कियो । कामाभिङ्गाको रातो कार्डप्रति असन्तुष्टि जनाउँदै रियलका खेलाडी र प्रशिक्षकले निर्णयलाई ‘अन्यायपूर्ण’ भने । यसै क्रममा आर्डा गुलरले पनि रेफ्रीसँग विवाद गरेपछि सिधै रातो कार्ड पाए । यस जितसँगै बायर्न म्युनिख सेमिफाइनलमा प्रवेश गरेको छ, जहाँ उसले पेरिस सेन्ट-जर्मेनसँग प्रतिस्पर्धा गर्नेछ ।