एजेन्सी । इजिप्टको दक्षिणी क्षेत्रमा अवस्थित तीन हजार वर्ष पुरानो मन्दिरमा सूर्यको किरण प्रवेश गरी प्राचीन मूर्तिहरूलाई उज्यालो पार्ने दुर्लभ खगोलीय दृश्य अवलोकन गर्न सयौँ पर्यटक तथा स्थानीयवासी भेला भएका छन्।
रामसेस द्वितीयको महान् मन्दिरमा वर्षमा दुई पटक अक्टोबर २२ र फेब्रुअरी २२ मा सूर्यको किरण भित्री कक्षसम्म पुग्ने गर्दछ। प्राचीन इजिप्टका राजा रामसेस द्वितीयको जन्मदिन र सिंहासन आरोहणसँग सम्बन्धित मानिने यी मितिमा देखिने विशेष दृश्यले पर्यटकलाई आकर्षित गर्दै आएको छ।
मन्दिरको वास्तुकला र सूर्यको अवस्थाबीचको विशेष पङ्क्तिबद्धताका कारण सूर्योदयको किरण मन्दिरभित्र करिब २० मिनेटसम्म रहन्छ। अँध्यारो रहने भित्री कक्षमा सूर्यको प्रकाश करिब ६० मिटर भित्रसम्म पुगेर विशाल मूर्तिहरूलाई उज्यालो पार्ने गर्दछ।
दुर्लभ दृश्य अवलोकन गर्न पर्यटकहरू बिहानैदेखि मन्दिर परिसरमा लामबद्ध भएका थिए। कतिपय पर्यटक रातभर मन्दिरबाहिर बसेका थिए भने अन्यले मोबाइल फोन र क्यामेराबाट तस्बिर खिच्दै तथा सेल्फी लिँदै दृश्यको आनन्द लिएका थिए।
इटालीका पर्यटकका लागि स्थानीय पथप्रदर्शकका रूपमा काम गर्ने हिशाम खेलाका अनुसार यो दिन धार्मिक, सांस्कृतिक र ऐतिहासिक महत्त्व बोकेको विशेष अवसर हो।
उत्सवका क्रममा परम्परागत पोसाकमा सजिएका कलाकारहरूले घण्टी, तबला र प्राचीन इजिप्टको बिगुलजस्तो बाजा मिजमारको धुनमा नृत्य प्रस्तुत गरेका थिए। सांस्कृतिक प्रस्तुतिले मन्दिर परिसरको वातावरण थप उत्सवमय बनेको थियो।
मन्दिरको भित्री कक्षमा राजा रामसेस द्वितीयसँगै अमुन–रा र रा–होरख्ती देवताका मूर्तिहरू रहेका छन्। वर्षमा दुई पटक प्रवेश गर्ने सूर्यको किरणले यी मूर्तिहरूलाई उज्यालो पार्ने दृश्यलाई प्राचीन इजिप्टको वास्तुकला र खगोलीय ज्ञानको उल्लेखनीय उदाहरण मानिन्छ।
नेसनल रिसर्च इन्स्टिच्युट अफ एस्ट्रोनोमी एन्ड जियोफिजिक्सका अनुसार सूर्यको विशेष अवस्थासँग मन्दिरको संरचनाको पङ्क्तिबद्धताका कारण यो दृश्य सम्भव भएको हो।
अमेरिकाको एटलान्टाबाट इजिप्ट पुगेकी पर्यटक जेनिस साउदीले मन्दिरका विशाल मूर्ति, भित्तामा कुँदिएका आकृति, चित्रलिपि र संरक्षित रङहरूले आफूलाई विशेष रूपमा प्रभावित पारेको बताइन्।
सन् १९६० को दशकमा अस्वान उच्च बाँध निर्माणका कारण पानीको सतह बढ्दा मन्दिर डुबानमा पर्ने जोखिम उत्पन्न भएको थियो। त्यसपछि पुरातत्त्वविद् र इन्जिनियरहरूले ठूलो संरक्षण परियोजनामार्फत मन्दिरलाई सुरक्षित स्थानमा स्थानान्तरण गरेका थिए।
स्थानान्तरणका क्रममा मन्दिरको सूर्यसँगको विशेष पङ्क्तिबद्धता कायम राख्न विशेष ध्यान दिइएको थियो। त्यसैले हजारौँ वर्ष पुरानो वास्तु संरचनासँग जोडिएको सूर्यको दुर्लभ दृश्य आज पनि वर्षमा दुई पटक अवलोकन गर्न सकिन्छ।
प्राचीन इजिप्टको वास्तुकला, खगोलीय ज्ञान र सांस्कृतिक सम्पदाको अद्भुत संयोजनका रूपमा रहेको यो मन्दिरले विश्वभरका पर्यटक तथा इतिहासप्रेमीलाई आकर्षित गर्दै आएको छ।