जर्मनीमा अमेजनले १६ अर्ब युरोभन्दा बढी लगानी गर्ने

1.1k Shares

बर्लिन । अमेरिकी प्रविधि कम्पनी अमेजनले सन् २०२७ मा जर्मनीमा १६ अर्ब युरोभन्दा बढी (करिब १८ अर्ब अमेरिकी डलर) लगानी गर्ने घोषणा गरेको छ। कम्पनीले डाटा सेन्टर, कृत्रिम बुद्धिमत्ता (एआई), क्लाउड कम्प्युटिङ र अन्य प्रविधिजन्य पूर्वाधार विस्तारमा उक्त रकम खर्च गर्ने जनाएको छ।

बर्लिनमा मङ्गलबार आयोजित सरकारी व्यावसायिक शिखर सम्मेलनका क्रममा अमेजनले नयाँ लगानीको घोषणा गरेको हो। सुस्त अर्थतन्त्रलाई गति दिन र उच्च प्रविधिका क्षेत्रमा विदेशी लगानी आकर्षित गर्न प्रयासरत जर्मनीका लागि यो घोषणा महत्त्वपूर्ण मानिएको छ।

अमेजनका प्रमुख विश्वव्यापी मामिला तथा कानुनी अधिकारी डेभिड जापोल्स्कीले जर्मनीलाई नवप्रवर्तनको केन्द्र र युरोपमा लगानीका लागि आकर्षक गन्तव्यका रूपमा व्याख्या गरे। उनका अनुसार कम्पनीले सन् २०१० यता जर्मनीमा १०० अर्ब युरोभन्दा बढी लगानी गरिसकेको छ।

जर्मनीकी अर्थमन्त्री क्याथरिन राइचेले अमेजनको नयाँ लगानीले अन्तर्राष्ट्रिय प्रविधि प्रतिस्पर्धामा जर्मनीको स्थान बलियो बनाउने बताइन्। यसबाट आर्थिक गतिविधि विस्तार हुनुका साथै रोजगारीका अवसरसमेत बढ्ने उनको भनाइ छ।

एआई र क्लाउड पूर्वाधारमा विशेष जोड

अमेजनको प्रस्तावित लगानीमध्ये करिब पाँच अर्ब युरो फ्रान्कफर्ट क्षेत्रमा खर्च गरिनेछ। उक्त रकम कम्पनीको क्लाउड कम्प्युटिङ सेवा अमेजन वेब सर्भिसेज (एडब्लुएस) को पूर्वाधार विस्तारमा उपयोग गरिनेछ।

एआई सेवाको माग बढ्दै गएपछि कम्पनीले आफ्नो प्राविधिक क्षमता विस्तार गर्न लागेको हो। यसका अतिरिक्त अमेजनले आफ्नो स्याटेलाइट सञ्जालमा आधारित उच्च गतिको इन्टरनेट सेवा ‘अमेजन लियो’ मा लगानी गर्ने योजना बनाएको छ।

कम्पनीले गोदामहरूमा रोबोटिक्स प्रविधिको प्रयोग बढाएर सञ्चालन प्रणालीलाई आधुनिक बनाउने जनाएको छ। त्यस्तै, भिडियो स्ट्रिमिङ सेवा प्राइम भिडियोले जर्मनीमा थप सामग्री निर्माण तथा छायाङ्कन गर्ने योजना अघि सारेको छ।

मङ्गलबार सम्पन्न लगानी सम्मेलनमा जर्मनी र अन्य देशका २०० भन्दा बढी व्यावसायिक नेतृत्व सहभागी भएका थिए।

अर्थतन्त्र सुधार्ने जर्मनीको प्रयास

जर्मन सरकारले सुस्त अर्थतन्त्रलाई पुनः गतिशील बनाउन स्वदेशी तथा विदेशी कम्पनीलाई थप लगानी गर्न र व्यावसायिक गतिविधि विस्तार गर्न प्रोत्साहित गरिरहेको छ। यद्यपि, जटिल प्रशासनिक प्रक्रिया, उच्च ऊर्जा लागत र दक्ष जनशक्तिको अभावले लगानीको वातावरणमा चुनौती सिर्जना गर्दै आएका छन्।

सम्मेलनमा बोल्दै जर्मन चान्सलर फ्रेडरिक मर्जले आफ्नो गठबन्धन सरकारले दशकौँयताकै महत्त्वाकाङ्क्षी सुधार तथा आधुनिकीकरण अभियान सुरु गरेको बताए। उनले सुधारका कार्यक्रम पूर्ण रूपमा कार्यान्वयन गर्ने प्रतिबद्धता पनि व्यक्त गरे।

उनका अनुसार सरकारका प्राथमिकतामा कर कटौती, प्रशासनिक झन्झट न्यूनीकरण र वित्तीय बजारलाई सुदृढ बनाउने विषय छन्।

अर्थमन्त्री राइचेले यसअघि एक रेडियो अन्तर्वार्तामा सम्मेलनमा सहभागी विभिन्न कम्पनीले हालसम्म २२० अर्ब युरोभन्दा बढी लगानी गर्ने प्रतिबद्धता जनाएको जानकारी दिएकी थिइन्।

यसैबीच, चान्सलर मर्जले सोमबार एआई चिप निर्माता कम्पनी एनभिडियाका प्रमुख कार्यकारी अधिकृत जेन्सेन हुआङसँग छलफल गर्दै सम्मेलनको उद्घाटन गरेका थिए। उक्त अवसरमा बर्लिनले औद्योगिक क्षेत्रमा एआईको प्रयोग विस्तार गर्ने उद्देश्यसहित एनभिडियासँग साझेदारी घोषणा गरेको थियो।

बलियो उत्पादन क्षेत्र भएको जर्मनीले उद्योगमा एआईको प्रयोग विस्तार गरी अन्तर्राष्ट्रिय बजारमा आफ्नो प्रतिस्पर्धात्मक क्षमता सुदृढ गर्ने लक्ष्य राखेको छ।

सम्बन्धित समाचार