काठमाडौं । राष्ट्रिय प्रजातन्त्र पार्टी (राप्रपा) बागमती प्रदेश कार्य समितिले पार्टी अध्यक्ष राजेन्द्र लिङ्देनलाई ध्यानाकर्षण पत्र बुझाउँदै आफूहरूमाथि लगाइएका आरोप प्रमाणित गर्न माग गरेको छ।
प्रदेश कार्य समितिले पार्टी नेतृत्वबाट लगाइएका विभिन्न आरोपप्रति आपत्ति जनाउँदै त्यसको आधार र प्रमाण सार्वजनिक गर्न माग गरेको हो। आरोप लगाइएको भए त्यसलाई पुष्टि गर्ने तथ्य तथा प्रमाणसमेत प्रस्तुत गर्नुपर्ने बागमती प्रदेश समितिको धारणा छ।
ध्यानाकर्षण पत्रमा पार्टीभित्र उत्पन्न विवादलाई तथ्य र प्रमाणका आधारमा समाधान गर्नुपर्ने उल्लेख गरिएको छ। प्रदेश समितिले आफूहरूमाथि लगाइएका आरोपबारे स्पष्ट जवाफ दिन नेतृत्वसमक्ष आग्रह गरेको छ।
राप्रपाभित्र पछिल्लो समय बागमती प्रदेशसँग सम्बन्धित विषयलाई लिएर विवाद देखिँदै आएको छ। प्रदेश कार्य समितिले नेतृत्वको निर्णय र आरोपप्रति आफ्नो धारणा सार्वजनिक गर्दै पार्टीभित्र संवाद र प्रक्रियागत रूपमा समस्या समाधान गर्नुपर्नेमा जोड दिएको जनाएको छ।