मोदीको घोषणा : २०४७ सम्म ‘विकसित भारत’ निर्माण गर्ने लक्ष्य

1.2k Shares

नयाँदिल्ली । भारतीय प्रधानमन्त्री नरेन्द्र मोदीले भारतको ८०औँ स्वतन्त्रता दिवसका अवसरमा शनिबार नयाँदिल्लीस्थित लालकिल्लाबाट राष्ट्रका नाममा सम्बोधन गर्दै सन् २०४७ सम्म भारतलाई ‘विकसित राष्ट्र’ बनाउने सङ्कल्प दोहोर्‍याएका छन्। उनले भारतको विकास यात्रालाई अझ तीव्र बनाउँदै आत्मनिर्भरता, प्रविधि, उत्पादन, ऊर्जा सुरक्षा र युवाशक्तिलाई प्राथमिकतामा राख्ने बताए।

मोदीले ‘विकसित भारत’को लक्ष्य केवल सरकारको नभई प्रत्येक भारतीयको साझा राष्ट्रिय अभियान भएको बताए। उनका अनुसार ठूलो सपना, दृढ सङ्कल्प र सामूहिक प्रयासबाट भारतले आगामी दुई दशकमा विकसित राष्ट्रको हैसियत हासिल गर्न सक्छ। उनले देशको आर्थिक रूपान्तरण, गरिबी न्यूनीकरण र उत्पादन क्षमतामा भएको वृद्धिलाई विकासको आधारका रूपमा प्रस्तुत गरे।

सम्बोधनका क्रममा मोदीले आत्मनिर्भर भारत अभियानलाई थप बल दिने बताए। ‘मेक इन इन्डिया’, स्वदेशी उत्पादन र स्थानीय वस्तुको प्रयोगलाई प्रोत्साहन गर्दै भारतलाई विश्वव्यापी उत्पादन केन्द्रका रूपमा अघि बढाउने उनको जोड थियो। उनले प्रविधि, सेमिकन्डक्टर, कृत्रिम बौद्धिकता (एआई) र नवप्रवर्तनलाई आगामी विकासको महत्वपूर्ण आधारका रूपमा उल्लेख गरे।

युवालाई केन्द्रमा राख्दै मोदीले एक करोड युवालाई एआईसम्बन्धी तालिम दिने योजना र प्रतिस्पर्धात्मक परीक्षाका तयारीकर्ताका लागि निःशुल्क अनलाइन कोचिङको घोषणा गरेका छन्। साथै, खेलकुद प्रतिभा पहिचान गरी भारतको आगामी ओलम्पिक लक्ष्यलाई बलियो बनाउने योजनासमेत उनले अघि सारे।

ऊर्जा सुरक्षालाई पनि मोदीले विकसित भारतको महत्वपूर्ण आधारका रूपमा प्रस्तुत गरे। उनले सन् २०४७ सम्म १०० गिगावाट आणविक ऊर्जा उत्पादन क्षमताको लक्ष्यतर्फ अघि बढिरहेको बताए। यसका लागि पाँच नयाँ आणविक रिएक्टर निर्माण गर्ने योजनाबारे पनि उनले जानकारी दिए।

मोदीले ‘सप्तधारा’ अवधारणामार्फत विकसित भारत निर्माणका लागि उत्पादन, कृषि तथा खाद्य प्रशोधन, प्रविधि तथा नवप्रवर्तन, पूर्वाधार तथा कनेक्टिभिटी, सुरक्षा, हरित तथा नीलो अर्थतन्त्र र भारतको सांस्कृतिक प्रभावजस्ता क्षेत्रलाई जोड दिएका छन्। यी क्षेत्रलाई एकीकृत रूपमा अघि बढाएर भारतलाई आर्थिक तथा रणनीतिक रूपमा अझ बलियो बनाउने उनको लक्ष्य छ।

सम्बोधनमा मोदीले हालै बाढी तथा पहिरोबाट प्रभावित नागरिकप्रति सहानुभूति व्यक्त गर्दै प्रभावित परिवारलाई सरकारको साथ रहने आश्वासनसमेत दिए। यस वर्षको स्वतन्त्रता दिवस समारोहमा पहिलोपटक लालकिल्लाबाट पूर्ण रूपमा ‘वन्दे मातरम्’ प्रस्तुत हुनु पनि विशेष आकर्षण बनेको थियो।

मोदीले सन् २०४७ मा भारतले स्वतन्त्रताको १०० वर्ष पूरा गर्दा विकसित राष्ट्रका रूपमा विश्वसामु उभिने लक्ष्यलाई राष्ट्रिय संकल्पका रूपमा अघि सारेका छन्। उनले त्यसका लागि सरकार मात्र नभई देशका नागरिक, युवा, उद्यमी, किसान, वैज्ञानिक र विभिन्न क्षेत्रका जनशक्तिको सामूहिक योगदान आवश्यक रहेको बताए।

सम्बन्धित समाचार